ഇന്ത്യ എങ്ങനെ ഷോപ്പിംഗ് നടത്തുന്നുവെന്ന് മനസ്സിലാക്കിയുള്ള തന്ത്രത്തിന്റെ ഫലമാണ് സുഡിയോയുടെ ഇന്നത്തെ വിജയം. കഴിഞ്ഞ കുറച്ച് വര്ഷങ്ങളായി വിപണിയിലെ ട്രെന്ഡിങ് വസ്ത്ര ബ്രാന്ഡായി തിളങ്ങുകയാണ് സുഡിയോ. കുറഞ്ഞ വിലയിലും മികച്ച ഫാഷനിലും വസ്ത്രങ്ങള് വാങ്ങാന് യുവാക്കള്ക്കിപ്പോള് മറ്റൊരു ചോയ്സില്ല. ടാറ്റാ ഗ്രൂപ്പിന്റെ കീഴിലുള്ള ട്രെന്റ് എന്ന കമ്പനിക്ക് കീഴിലുള്ള വസ്ത്ര ബിസിനസാണ് സുഡിയോ. ഒരു പരസ്യം പോലും ചെയ്യാതെ വലിയ സെയില്സാണ് കമ്പനി നേടുന്നത്. സുഡിയോയുടെ അതിവേഗ വളര്ച്ച ടാറ്റയ്ക്ക് വലിയ മുതല്ക്കൂട്ടായി.
ഓരോ വര്ഷവും നൂറുകണക്കിന് പുതിയ സ്റ്റോറുകള് ആരംഭിക്കുകയും നിലവിലുള്ള സ്റ്റോറുകളില് വില്പ്പന ശക്തമായി ഉയരുകയും ചെയ്തതോടെ, കോവിഡിന് ശേഷം ഇന്ത്യയില് മികച്ച ലാഭം കൊയ്യുന്ന കമ്പനികളില് ഒന്നായി ഇതിനെ മാറ്റി.
പരസ്യത്തിനും മാര്ക്കറ്റിങിനും പണം ചിലവഴിക്കുന്നതിന് പകരം അത് വിലക്കിഴിവിന്റെ രൂപത്തില് ഉപയോക്താക്കളിലേക്ക് എത്തിക്കുക എന്ന തന്ത്രമാണ് സുഡിയോ സ്വീകരിച്ചത്. ഇത്തരമൊരു ബ്രാന്ഡ് സ്ഥാപിച്ചതാണ് ടാറ്റയ്ക്ക് ഗുണം ചെയ്തത്. അപ്പര് മിഡില് ക്ലാസ്, മിഡില് ക്ലാസ് ഉപയോക്താക്കള്ക്കായി ടാറ്റയുടെ തന്നെ റീടെയില് ബ്രാന്ഡായ വെസ്റ്റ് സൈഡ് നിലവിലുള്ളതും കമ്പനിക്ക് ഗുണം ചെയ്തു. ഇത് സുഡിയോയ്ക്ക് കൂടുതല് സ്വാതന്ത്ര്യം നല്കി.
ഫാഷന് സ്റ്റേറ്റ്മെന്റിനോടൊപ്പം നിത്യോപയോഗ വസ്ത്രങ്ങളുടെ ശ്രേണിയിലാണ് സുഡിയോ കൂടുതല് ഊന്നല് നല്കിയത്. നടപ്പു സാമ്പത്തിക വര്ഷത്തെ കണക്കുകള് പ്രകാരം സുഡിയോയുടെ 85% ഉല്പന്നങ്ങള്ക്കും 1,000 രൂപയില് താഴെയാണ് വില. ഇതില്ത്തന്നെ 300-500 രൂപ റേഞ്ചിലുള്ള ഉത്പന്നങ്ങള് കൂടുതലാണ്. ഇത്തരത്തില് ലളിതമായ വിലയും 3-4 ആഴ്ച്ചകളില് നടപ്പാക്കുന്ന സ്റ്റൈല് മാറ്റങ്ങളും ബ്രാന്ഡിനെ സഹായിക്കുന്നുണ്ട്. അടുത്തിടെ ഒരോ മിനിറ്റിലും സുഡിയോ സ്റ്റോറുകളില് 220 ടീ-ഷര്ട്ടുകള് വില്പന നടത്തുന്നുവെന്നും റിപ്പോര്ട്ടുകളുണ്ടായിരുന്നു.
ഇന്ത്യ എങ്ങനെ ഷോപ്പിംഗ് നടത്തുന്നുവെന്ന് മനസ്സിലാക്കിയുള്ള ഒരു തന്ത്രത്തിന്റെ ഫലമാണ് ഇപ്പോഴത്തെ വിജയം. പല ബ്രാന്ഡുകളും സെലിബ്രിറ്റികളുടെ അംഗീകാരങ്ങള്ക്കും പരസ്യങ്ങള്ക്കുമായി പണം ഒഴുക്കിയപ്പോള്, ആളുകള് യഥാര്ത്ഥത്തില് താമസിക്കുന്നതും ഷോപ്പിംഗ് നടത്തുന്നതുമായ സ്റ്റോറുകള് തുറക്കുന്നതിലാണ് ടാറ്റ ശ്രദ്ധ കേന്ദ്രീകരിച്ചത്. നന്നായി വസ്ത്രം ധരിക്കാന് ആഗ്രഹിക്കുന്ന, ന്യായമായ വിലകള് ആഗ്രഹിക്കുന്ന ഒരു ഉപഭോക്താവിനെ ആകര്ഷിക്കുന്നതിനായി ചെറു നഗരങ്ങളില് കമ്പനി ശക്തികേന്ദ്രമായി മാറിയത് ഗുണകരമായി.
അതേസമയം, ചെറു പട്ടണങ്ങളില് ചില പ്രാദേശിക റീട്ടെയില് കമ്പനികള് തങ്ങളുടെ സ്റ്റോര് നെറ്റ്വര്ക്കുകള് വ്യാപിപ്പിക്കുകയും, സാമ്പത്തിക നില ശക്തമാക്കുകയും ചെയ്യുന്നുണ്ട്. പല കമ്പനികളുടെയും പ്രവര്ത്തന ലാഭ മാര്ജിന് മെച്ചപ്പെടുന്നുണ്ട്. ഇവയില് പല കമ്പനികളും കുറഞ്ഞ ചെലവില് പ്രവര്ത്തിക്കുകയും, പ്രാദേശികമായി ശക്തമായ ബ്രാന്ഡ് എന്ന ലേബല് കൈവരിക്കുകയും ചെയ്യുന്നു. സുഡിയോ ഒരേ സമയം വളരുകയും മറ്റു ചെറു കമ്പനികള്ക്ക് വളരാനുള്ള അവസരം ഒരുക്കി കൊടുക്കുകയും ചെയ്യുന്നുവെന്ന് വേണം മനസിലാക്കാന്
Content Highlights: Zudio, owned by Trent under the Tata Group, has rapidly grown into a major strength